Confessional song

Sidan kamera-ledninga mi er teit, og eg difor ikkje får lasta opp bilete frå dåpen, og difor ikkje kan fortelje om den enno, får eg heller skrive utan mål og meining. Denne gongen tenkte eg at eg skulle hive meg på blogg-trenden med å avsløre skuggesider ved meg og mitt i den obligatoriske listeforma. Enjoy.


- Eg er fullstendig og uhelbredeleg avhengig av Pepsi Max, og har på noverande tidspunkt null ønske om ikkje å vere det.
- Eg et eit kilo brunost i veka. Eller, ikkje no då; no er eg på avvenning (ikkje at det er noko utfordring; etter tre veker og ditto kilo brunost, har eg merkeleg nok mista smaken på det).
- Mamma kjøper Se og Hør, noko eg dømmer ho høglytt for, mens eg les bladet i smug.
- Eg klarer aldri å svare når eg blir spurt om mi religiøse tru, for sjølv om eg har den krystallklart for meg inni meg, får eg aldri til å forklare den med ord.
- Løvenes Konge var den første filmen som gjorde meg rørt til tårer, og det er framleis yndlingsfilmen min.
- Eg har aldri prøvd å røyke.
- Eg trur på englar.
- Eg har aldri skjønt kva Israel/Palestina-konflikta eigentleg dreier seg om.
- Eg hatar å vere på Ikea.
- Eg har eit sterkt ønske om å slette Facebook-profilen min, men grunnen til at eg ikkje gjer det er at eg ikkje taklar tanken på at det vil leggast ut bilete av meg som eg ikkje får sett.
- Eg er voldsomt heimekjær.
- Kvar gong eg er ute og går med Mp3-en plugga i øyrene, dagdrøymer eg så mykje at eg gløymer alt som heiter trafikkreglar, og vert nesten påkøyrt i gongfelta.
- Eg elskar musikken til Bjørn Eidsvåg.
- Då eg var mindre, trudde eg at Afrika låg i Bremanger.
- Eg får frysningar av isopor.
- Eg tolkar alltid eit anna menneske sin tausheit som bekreftelse på det eg fryktar mest.
- Eg hatar å jogge. Verkeleg HATAR.
- Eg er ikkje sikker på om eg har valt rett studie.
- Eg kan blåse opp nasebora.
- Eg treng tjue positive bemerkningar for å vege opp for èi negativ.
- Eg vaskar håret maks to gongar i veka.
- Eg har bamsen min, som eg har hatt alltid, ved sidan av meg i senga kvar natt, i tillegg til den eg laga på Folkehøgskulen. Dersom eg ikkje gjev dei begge like stor godnattklem og -kyss, får eg dårleg samvit. Dersom eg gløymer det heilt ein kveld eg er veldig trøtt, føler eg det som om eg har begått alvorleg omsorgssvikt.
- Eg får ikkje sove før eg har sjekka i skapet at det ikkje er nokon der.
- Eg var den nest siste i klassen som lærte å svømme.
- Eg elskar sommarfuglar.
- På veldig mange plan likar eg dyr betre enn menneske, og har heilt sidan eg var bitteliten hatt ein tilbøyelegheit til å sympatisere meir med dei enn med folk.
- Som barn var eg redd for alt.
- Eg er framleis over gjennomsnittet engsteleg.