Det som er fint på ein torsdag

... er at det er torsdag, for det er yndlingsdagen min i veka. Dagen før helg, men likevel er det ein kvardag som har kvardagen sine moglegheiter kombinert med utsiktene om helga sine pustepauser.

... er vårregnet, som har ein heilt spesiell plass i mitt hjarte. Det forsterkar alle lukter og synsinntrykk, løftar opp alt det spirande grøne, og er lada med noko berre våren veit.

... er det spesielle gule lyset som kjem etter ein skikkelig vårregnskur. Som Jens Lekman syng: "It's like someone spilled a beer all over the atmosphere". Eg veit ikkje om eg likar det biletet han malar der, men eg trur eg likar det.

... er å sjå "Torsdags kveld fra Nydalen" (ELSE!)

... er å skrive dikt berre ein sjølv forstår (?)

Om å vere redd for islandsk vulkanstøv 

Eg svevar i eit oskefylt tomrom

til staden der ein blir blenda

av alle lovnadene som lurer

ein til å tru at ein er noko

som kan bli noko

der dagane døyr

ein sakte, pinefull

morgon

fordi du berre følgjer draumane

og aldri rører dei

støv

på pianotangentane du dansa over som elleveåring

og på word-dokumentet

bleikt og utemjeleg som dine villaste fantasiar

kvite ord

du trur du vil skrive ein dag

men det einaste som kveler pusten

er det veldige luftrommet

i å vite at ein kan klare