Confessional song vol. II

Hei, eg heiter June, og eg...

... kjøper klistermerker og/eller hårklemmer på dårlege dagar.

... har eit særdeles traumatisk forhold til Jakten på nyresteinen.

... tek bilete i smug av eldre par som held hender (dersom du spør pent, kan du få sjå samlinga mi).

... svarar berre ærleg på livet sitt største spørsmål, "korleis har du det", til ein handfull personar. 

... elskar og hatar å skrive. 

... vil så gjerne vise fleire av mine ukonvensjonelle sider til fleire enn nokon få, men eg krympar under eit blikk som har eit snev av dom i seg, og endar opp med å moderere meg sjølv og så hate meg for det.

... er ei klemmejente.

... har ein blome i ei potte som heiter Trygve (blomen altså, ikkje potta).

... skulle ønske livet av og til var som på film. Og det er det jo. Men litt oftare, liksom.

... har byrja å jogge jamleg, og likar det.

... føler eit hopp innvendig og ei rein lukke, heilt utan å reflektere over den (som eg vanlegvis gjer), kvar gong eg ser ein hund eller katt, eller kva det måtte vere frå dyreriket, på gata.

... mistar trua på meg sjølv og verda annakvar dag.

... et ei skål firkorn med ekstra lett melk på og ei teskei jorbærsylte til frukost kvar dag, bortsett frå kanskje søndag.

... blir kvalm av vampyrseriar. Ikkje på grunn av synet av bit og blod, men lydane. Knekke-lyden i bitet, slurpe- og slafselydanse, glugg glugg når dei drikk blodet og æsj.

... er terapeutisk avhengig av å strikke for tida.

... likar ikkje når pærene er blaute, ikkje littegrann eingong, men eg likar det meste anna som er det. Eg er ei sånn jente som let kjeksa ligge i ein open pakke ei veke for at dei skal bli mjuke, og som lagar til frukostblandinga tjue minutt før eg skal ete den.

... elskar jul.

...tenker kvar dag at "i dag skal eg droppe forelesing og heller gå ut i skogen eller på fjellet, ikkje planlegge noko, berre stenge verda ute, kanskje ta med ei bok", drite i alt eg skal og bør og må, utøve sivil ulydnad mot den strenge øvrigheita inni meg. Men eg utset det alltid. "Må berre få kontroll på pensum først. SÅ skal eg vere impulsiv og rebelsk". Utan å planlegge noko, så klart.

... er full av kontrastar, og sjølv om det har gjort og gjer meg sprø, ønskar eg det ikkje annleis.