It's like taking a guess when the only answer is yes

Dag sju (det sto ingenting i utfordringa om at dagane måtte komme etter kvarandre!): 

Ti beste kjensler

Éin
Når du innser at ingenting vart slik du trudde, og på ein god måte. 

To
Når du har klart å gjennomføre noko du har grudd deg veldig til. 

Tre
Når du ser tilbake og skjønar at livet er rikare enn du noko gong kunne forestilt deg. At redslane for framtida er totalt meiningslause, for instansen du har til å frykte med - deg sjølv - er i konstant utvikling. Slik at når det du fryktar mest likevel skjer, har du endra deg til ei som kan overleve det, og kanskje til og med gjere det til ei stor styrke.


Fire
Å finne att noko ein hadde mista. 


Fem
Å oppleve gjensynsglede, anten ein sjølv eller gjennom andre. (Dersom sistnemnde: flyplassar og tog-/busstasjonar) 

Seks
Når verda sine lause trådar samlar seg og du pustar inn lufta i djupe drag, kvar enn du er - ein dag du går tur i regnet, sit på eit buss-stopp, kva som helst - og  du veit at det er akkurat der du skal vere. 

Sju
Å gå ut frå eit eksamenslokale etter semesteret sin siste eksamen.


Åtte
Å kjenne ei lukt, høyre ein song eller lyd, eller på ein eller anna måte oppleve eit uventa sanseinntrykk som dreg deg tilbake til det å vere seks år og på kvitveis-jakt i barnehagen, eller elleve år og springe rundt i hagen i gummistøvlar med to kattar og ei kanin i hælane. Also known as nostalgi.

Ni
Latterkrampe.

Ti
Å føle at formuleringane sit. At orda som myldrar som maur på papiret eller skjermen, bestem seg for å vere godvener med deg, og stiller seg opp i rekkjer slik du vil (men ikkje kan gje instruksjonar om). Så du nesten berre kan lene deg tilbake i kriblinga som seier "jess".